У ошкыл, у шонымаш, у паша

Тачысе саманыште Интернет ик эн ончыл верыште. Тудын тӱня мучко шыҥдаралтмыж дене мемнан илышна палынак вашталтын. Эше икмыняр ий ончыч массовый информаций средство-влак кокла гыч телевидений ончыл верыште лийын. Калыкын канде экран воктене пел ял дене погынымо пагытымат моткоч сайын шарнена.Телевидений моткоч чот ӧрыктарыше, калыкым ончыко, у сеҥымашыш наҥгайыше, у деч у технологий дене палдарыше вий лийын. А ме тиде кок йогыным пырля ушена. Тыге шочын «ОНЧО-ТВ» Интернет канал, Интернет телевидений. Тиде шонымаш шукертак лектын да вияҥын.

Тыште ме тыланда икмыняр лаштыкым ямдыленна: тӱрлӧ ийлаште войзымо документальный фильм, кино да мультфильм, концерт да спектакль-влак, тыгодым вияш эфир, стрим да подкаст-влак. Ме Тендам чоным луштарыше, вийым пуышо, шинчам куандарыше мотор вер-влак дене палымым ыштена. Оҥай конкурс да моло оҥай темлымаш лийыт.

Татьяна Ямбердова Вениамин Михайлович Портов дене интервьюм воза
Шымлызе да уста музыкант, педагог Татьяна Ямбердова нерген репортажым ямдылыме годым. Татьяна ия ковыж нерген Звенигово район Эсмекплак ялыште Кугу Отечественный сарын ветеранже Вениамин Михайлович Портов дене интервьюм воза. 2013 ий.
Олег Токтаров дене вашлиймаш деч вара
Кумдан чапланыше киноактёр, спортсмен, телевӱдышӧ, кинопродюсер, режиссёр, мер пашаеҥ Олег Токтаров дене вашлиймаш деч вара. М. Шкетан лӱмеш марий кугыжаныш драме театр, 2016 ий.
Морко район Унчышто Онар кӱ воктене
Унчо вел — шерге вел…Морко район Унчышто Онар кӱ воктене. Фотошто: тоштер пашаеҥ Татьяна Титова, татар ӱдыр, журналист Алёна Иванова, режиссёр Надежда Степанова, мордва ӱдыр Татьяна, сценарист, писатель Денис Осокин.
«Унчоfest» фестиваль годым. 2018 ий.
Шорык тӱредме йӱла дене палыме лийына
Шорык тӱредме йӱла дене палыме лийына. «Юмын пӱрымӧ вольык» фильмым ямдылыме годым. Шернур район, Купсола, 2012 ий.

У ошкыл, у шонымаш, у паша.

Опубликовано